【轉】狂揼逾 15 網站 80 後月賺 6 萬

狂揼逾 15網站　 80後月賺 6萬
創業通
2010年09月15日



諗頭多多的 Ivan，於 6年內開設逾 15個網站，如講美容、 IT及醫生網，靠廣告收入賺錢，最近更成立 Bye Bye網，專講殯儀資料。

不停諗計，興趣多多，乜都想試，可謂 80後特色。

今年 29歲的 Ivan，亦因諗頭多多，於 6年內，不但代理及開發軟件，更先後開設超過 15個網站，包括 Beauty Talk、 Movie Talk、 Doctor List等，最近還踩入「死人」市場，開辦專講身後事的「 Bye Bye」網，實行密食當三番，現時靠軟件及網站帶來的廣告收益，每月盈利達 6萬，「多心」有時也非壞事。

相約 Ivan做訪問時，見他身高 6呎、西裝骨骨、外表老成，跟記者交換咭片，共有 4、 5張之多，一張是 zizsoft公司經理、一張又寫着香港青年創業家聯盟主席，名銜多多，咭片背後有十多個公司 logo，究竟 Ivan做啲乜？

「呢十幾個網站都係我搞 o架，因為我份人一得閒就諗呢樣、諗嗰樣，想試吓掂唔掂。」一開口， Ivan才似番 29歲後生仔，「個樣老成啲，見客可以呃吓人。」

Ivan不只樣貌呃到人，又擅長 sell客，他說門面工夫好重要，起初成立公司時，也是全靠包裝得好。 03年在英國修讀 IT的 Ivan，畢業回港做程式員，見公司正開發一些髮型屋收費軟件，覺得有利可圖，便向澳洲一間公司取得美容髮型行業收費軟件的香港代理權，打算自己創業。「要我自己去開發軟件，我又懶又冇錢，寧願攞個代理返嚟，自己去 sell客。」









Ivan還寫了一個「搜尋引擎優化系統」軟件，幫民主黨及蔡瀾等寫網頁，只要網頁更新資料，連 facebook和微博也一同 update。

扮開公司傾代理權

當時 Ivan膽粗粗向澳洲公司寄出一份計劃書，對方竟派員來港洽談代理事宜，結果 Ivan諗計演出一場大龍鳳。「我問朋友借咗個 office，由於佢就嚟搬， office冇晒枱凳，我叫班朋友搬啲枱凳嚟，又做臨記扮員工，我仲叫另一位朋友喺某啲鐘數打電話上 office，等對方覺得我哋公司係正常運作，最後我攞到個代理，而且唔使畀代理費，只要每個月最少 sell出 1套軟件，同番總公司拆賬。」

04年 6月取得代理後， Ivan索性租下朋友的 office，成立公司 zizsoft。 Ivan起初只識得 cold call sell客，每日跟着黃頁上的髮型屋資料，打百多個電話，經常被大罵和 cut線，令 Ivan頓感沮喪。

「好彩之後有個客肯見面傾細節，我着晒西裝、攞埋 notebook上去，對方見到我，仲以為我哋係一間有過百人嘅大公司，對我嘅信心大增。」結果傾成第一單生意，一套軟件售約 2萬元，他可分 5至 6成，約萬多元，第一個月終於有糧出。



Ivan（左）有代理收費軟件，專攻美容髮型行業。




客人 Joe（右）要營運一間髮型屋好唔容易，要 keep客人資料、又要管數，之前聽朋友講有套軟件好啱用，就上網搵到 Ivan，合作咗幾年，對佢啲服務都好滿意。






Ivan借朋友辦公室做戲，成功取得軟件代理，之後索性租來用，後來地方不夠大，他於樓上再租多個 office，兩個 office合共約 600呎。

搞分期付款吸新客

有了第一個客，口碑相傳， Ivan每月至少能售出一套軟件，為增加生意額，他便找銀行合作，搞分期付款，「有啲髮型屋同美容院，好難一筆過畀 2萬蚊出嚟，有咗分期付款，生意即刻大增，家已經有 120間公司用我哋套軟件。」除賣軟件的金額外， Ivan每年也會收取每位客人一筆約軟件售價 18%的服務費，約 3千多元，作為軟件支援服務，令他每月保持過萬盈利。

公司漸上軌道， Ivan又想搞新意思，請了 3、 4位員工幫手，前後開設了超過 15個網站，「我咩類型嘅網都想試吓，但主要做坊間少有嘅網站，例如專門介紹美容院、髮型屋等。反正我揼一個網出嚟，一啲都唔難。」

網站的營運形式主要是請一些專家來寫專欄，並找網上廣告代理公司接洽廣告，「我好鍾意四圍識人，為咗擴大人際網絡，之前一得閒就出席唔同嘅商會活動，好似年幾前，有朋友搞咗個香港青年創業家聯盟，今年個主席要返大陸搞生意，我就試吓競選，點知真係被選中做主席。」

業界人士撰寫專欄

Ivan邀請在商會認識到業界人士及一些 blogger，免費在其網站內寫專欄，有助吸引人瀏覽，其中包括兩個美容網 Beauty Talk、 ProB專業美容、醫生網 Doctor List等，所有網站每月合共有 45萬瀏覽量，廣告收益每月合計約 2萬。

但不是所有網站都有好反應，「有成 20個網胎死腹中，好似之前我搞咗個車網，因競爭太大，加上唔夠人手搵資料，結果失敗收場。亦搞過交友網，都有 4千個會員，但後來 facebook一出即摺，冇得鬥。」

此外， Ivan亦致力開設一些另類網站，當中以 smscash2U.com最成功，它是替客戶以 SMS形式，向網站會員做推廣，而會員每接收一個訊息，可得到 1元，滿 20元就可換取便利店現金券。 Ivan在小巴車身賣廣告，而會員推薦朋友入會有獎賞，這令會員人數上升，更吸引一些迷你倉和日本料理店等找他合作。

「網站初推出時，會員多達 20萬，第一個月營業額達 7至 8萬，淨賺 4萬蚊，但後來好多公司自己 send SMS，同埋多咗好多媒體落廣告，生意額開始回落，家得番約 3萬營業額。」
不過每當有嘢唔掂， Ivan便立即想其他計仔，去年便花了半年時間，寫了一個「搜尋引擎優化系統」的軟件，可以幫客戶在搜尋器中佔有利位置，如在 yahoo、 google排列在首頁，更可把網頁立即連結 facebook和微博上，省卻客人 update資料的時間，「總之個網頁有咩新資料，都可以同時喺佢嘅 facebook同微博即時 update，讀者即時可以得到最新資料。」




為踩入殯儀市場， Ivan到紅磡的殯儀用品公司搵客落廣告。「呢行好封閉式，啲人見到我嚟都唔想睬我。」




於 09年， Ivan用 smscash2U網站，參加有關 IT行業的 ICT頒獎禮，獲得第三名。

新搞作開殯儀網站

Ivan用這個軟件替客人寫一個 5頁的 website，便可收取 4至 5萬，是現時公司最賺錢的部分，「個軟件今年先推出，全靠之前我去得多商會活動，朋友介紹我幫仁愛堂、民主黨、蔡瀾等寫網頁，暫時靠人傳人宣傳，希望遲啲再多啲客。」

這套新軟件還屬起步階段， Ivan最近已全力搞另一個另類網站，看準殯儀市場，推出 Bye Bye網，「以前講到殯儀係禁忌，但近幾年開始多人談論呢個行業，我覺得呢個市場潛力好大。但呢個行業好封閉，想向佢哋攞資料，真係好難，尤其係我哋想公開棺材、壽衣等資料同價錢，更加困難。」

Ivan除了早前參加「亞洲殯儀博覽」，認識了一些行家外，更會走到紅磡等殯儀館， walk in找前輩傾偈，經過一番努力，與不少行家開始熟絡，掌握到不少資料，他希望把生意拓展成殯儀中介人服務，提供網上預訂祭品及一條龍服務等。

雖然「 Bye Bye」網現在的廣告收入僅 7、 8千，未知將來成效如何，但 Ivan笑言：「要成功，就要做啲人哋未做過嘅嘢，所以我會繼續不斷諗新計，搞新嘅網站，總會殺出一條血路。」

Ivan網站 成與敗

• 成功
  

  例子：	MyBeauty、 TechNew、 MovieTalk等
  原因：	做得夠「專」，如專門介紹髮型屋、美容屋、電影等，因此競爭對手少，可針對到相關的廣告客戶。
  營運方法：	請行內專業人士、 blogger及會員選寫文章及 update資訊，減低成本。
  收益：	由網上廣告中介公司轉介客戶，除網上的 banner廣告外，會刊登客戶的優惠 coupon，凡透過網站享用優惠，網站便會從中抽佣。

  
  
• 失敗
  

  例子：	車網、交友網等
  原因：	因有同類競爭網站，及需要大量人手 update資料。

  開業成本

  租金：	$3,000
  入貨：	$0
  裝修：	$0
  總投資：	$3,000

  每月開支（ 8月）

  租金：	$10,000（兩個 office）
  人工：	$80,000（ 6人）
  雜項：	$10,000
  營業額：	$160,000*
  盈利：	$60,000

  *現 7成收入來自軟件及製作網頁，其餘為網站廣告收入。

點申請分期付款？

想向銀行申請分期付款服務，首先要在銀行開設公司戶口，再經審批，銀行會收取 set up fee及年費，分別 2至 5千元，另每項分期付款脹戶分收 5至 8%的服務費。 Ivan表示一般美容及零售業會較容易批核，但由於他從事軟件售賣，沒有前例可循，所以要花半年時間審批，「之前銀行冇軟件公司嘅 case，不過銀行見我哋開咗年半戶口， credit又好，冇借錢唔還，所以肯批畀我哋，但手續比較多，搞咗半年時間先得。」

由於最近很多美容院結業，所以美容行業的數期為 90日，即銀行扣除客戶的分期付款數項後，要過 90日才過數給美容院，不過 Ivan只需 1至 2個星期，銀行便會過數給他，沒有現金周轉的困難。