備戰泰拳公開賽 吳浩康禁慾兩個月
忽然一週
2010年12月10日
記者現場觀察，吳浩康練習時都毫不欺場，拳拳到肉，打到「啪啪」聲。
27歲的吳浩康（ Deep），入行多年，星路平平。 01年於「香港泰拳搏擊爭霸戰」中奪冠的吳浩康，近年重返拳壇，更於灣仔當泰拳私人教練搵銀，徒弟有十個八個。
為了「響朵」，他即將參與 12月 11日的中量級公開拳賽，挑戰散打冠軍。兩個月來地獄式訓練，吳浩康狂減 20磅之餘，亦禁慾備戰，養精蓄銳。他說︰「真係要『禁』（慾） o架！」
互動片段
吳浩康與拿督女莊思敏拍拖 5年，計劃明年底迎娶女友。唱歌事業上發展麻麻，他惟有另謀出路。吳浩康 16歲認識世界級拳手向柏榮，跟住對方練拳。早前，向柏榮鼓勵他轉做泰拳私人教練，並安排他參與公開拳賽，對手則是曾於 08年散打王冠軍徐廣耀。對於今次出賽，吳浩康信心十足︰「同對手實力差唔多，論經驗我就優勝啲。」
吳續說︰「我 11歲開始學打拳，由細到大都有個心結，覺得點解泰拳唔可以好似跆拳道咁，俾人感覺係健康嘅運動，其實泰拳拳手都係運動員，唔係爛仔。師兄向柏榮亦好支持我，希望藉今次比賽，可以推廣呢項運動。」當然，贏了今次拳賽，可以大大提高吳浩康於業內的知名度，為他吸引更多學生。他現教的私人班分為單對單個別教、一對四與團體班，每課一小時，價錢由 1千至萬二不等。
邊佪夠我抽﹙設計對白﹚
女友專踢下體
12月 5日，吳浩康開記招公布將打公開拳賽，吳大爆女友兼徒弟莊思敏練習時曾兩度踢他「咕咕」（下體），莊笑言：「佢叫我踢 o架咋。（你專攻佢下體？）我踢歪咗啫！」
打拳如人生
入行多年，吳浩康經歷不少， 04年的藏毒案令他事業跌落谷底，但打拳卻令他領悟不少人生道理，重新振作。「其實打拳就好似人生咁，有起有跌。雖然入行以來，好多嘢都係我自己攞嚟！但打拳可以訓練我冷靜，每次對打的經驗亦可以累積智慧、意志力同面對困難嘅能耐。打拳唔係衝動嘅人能夠勝任，一拳一腳，唔係用死力就得，要思考，瞬間決定下一步點做、用咩對策。」
為迎戰下周拳賽，吳浩康這兩個多月來地獄式訓練，除了日日跑步練拳，節食減磅外，還跟足職業拳手操練方法，禁慾個多月，留力比賽。他說︰「每日愈早起身愈好，因為要將早餐同晚餐嘅食物份量調轉。黃昏 6點後就唔可以再食嘢，又要戒口，唔可以食太多澱粉質，所以唔夠一個月我已經減咗 20磅。」
拳賽前要禁慾？他說︰「職業拳手都咁做，我唔係好刻意禁，但呢兩個幾月掛住練習，真係冇（親熱）。不過又真係要『禁』（慾） o架！」女友莊思敏話：「我冇所謂喎！（唔見面？）盡量出街囉！唔好喺屋企對住，見面唔係為咗搞嘢嘅！」
起飛腳
為了練踢腳的準繩度，吳每天練踢腳二百下。
練捱打
打泰拳腹部最易中招，所以拳手要練捱打，吳叫師弟企在他肚上，讓他做 sit up，強化腹部肌肉，令其腹部受壓度增強。
倒吊 sit up
呢個倒吊 sit up的動作，是體能與耐力的最佳訓練，每日起碼做一百下。
向柏榮藝人徒弟多
吳浩康同門師兄向柏榮，是香港唯一的世界級拳手，曾奪不少大賽冠軍，包括挑戰者拳王爭霸賽冠軍、 WMC洲拳王金腰帶冠軍等。現為拳館總教練的他，培育出不少香港拳王，亦有不少星級徒弟，當中張家輝、官恩娜、鄧健泓、李詩韻及泳兒等亦曾跟他學拳。
向柏榮評師弟吳浩康︰「識咗 Deep十幾年。佢好有天份，又夠勤力，屬於技術型拳手。佢出拳都好狠好快。至於其他徒弟，令我深刻啲嘅係官恩娜，可能佢有跳舞底，好快上手，女仔嚟講佢打得好唔錯。」
官恩娜（左）：「我覺得泰拳可以釋放壓力，仲可以修腰同結實拜拜肉。」
鄧健泓說：「我跟向柏榮練咗半年，學泰拳係諗住強身健體，出賽就唔會，因為好易受傷。」
平日斯斯文文的李詩韻，亦曾跟向柏榮練過泰拳，睇佢揮拳姿勢都有板有眼喎！
吳浩康今次的對手是現任消防員兼 08年散打王徐廣耀，亦是吳浩康師弟，兩人為是次公開賽打壓軸戰。
.jpg)
.jpg)
.jpg)
.jpg)
.jpg)
.jpg)
