【轉】陪旅行社太子上房 高海寧即揸 30萬寶馬 ﹝有片︰咪神高海寧陪完仔 shopping﹞

陪旅行社太子上房　高海寧即揸 30萬寶馬
Face
2010年09月29日

高海寧 34C身材一向勁，呢張上年為《美女廚房》去泰國拍外景時的經典象拔咪相，更加係宅男必儲。

選港姐前仲喺女人街打躉嘅無綫咪神高海寧，最近同旅行社太子丘至剛（ Andy）打得火熱，把口唔肯認，上週五（ 24日）本刊卻撞破高咪神着住街坊裝鬼鬼鼠鼠陪男友上男方位於深井海韻花園嘅住所。
孖得太子爺男友，高海寧自己點可以失禮，最近更忽然見佢新牌仔揸部價值 30萬的寶馬新車四圍遊。
咪神吸金升呢快，幾時都話咪睇小女人。

• 互動片段
  
  咪神高海寧陪完仔 shopping
  

6呎太子爺

高海寧男友丘至剛身高 6呎 3，年約 30歲，喺加拿大 York University讀數學系，畢業後回港幫父親打理「東南西北旅遊有限公司」，旅行社主要幫人訂機票、酒店和自由行套票，現跟家人同住的深井海韻花園，是丘父於 93年以 240萬買入，現市值約 300萬，丘至剛唔算太富貴，但都算薄有家底啦！

24/9

19:00凌志接送
男友貴為旅行社太子，平時出入都有部價值 58萬的凌志四驅車車女友，之前亦試過俾雜誌影過喺此車內攬啜數分鐘。

19:45撞破揞面
男友買餸擺明準備同女友返屋企撐枱腳，可惜後來高海寧發現記者，除了刻意用手掩面外，又上樓 10分鐘即撇，連短聚都唔想俾人知。

19:55 10分鐘急閃
入屋遮晒樣，離去時就大方任你影，不過咪神冇叫男友揸車，自己搭的士去海港城繼續做騷。

20:45買貴嘢
揸得 30萬寶馬梗係要買番啲靚嘢襯吓，上週五（ 24日）高海寧從男友家閃撇後，明知有記者跟都繼續到尖沙咀海港城買 Giorgio Armani化妝品，擺明要話畀大家聽升咗呢。

高海寧的新款寶馬 118i私家車車價 27萬 8千，車輛登記顯示剛於今年 8月 24日落地，但登記人則是一名叫 Keung Oi Kam的人士，高的經理人話部車係佢自己儲錢買，咁點解又唔用自己名登記呢？

25/9新牌靚車

08年港姐出身嘅高海寧當年雖然落選，不過 34C上圍令人印象難忘，至上年 9月《美女廚房》泰國鹹象鼻事件，無綫新咪神正式誕生，連蘇民峰主持《民峰學院》都話佢條事業線生得好。

實花弗男友

雖則話高海寧谷胸搵到食，但女仔始終搵個靠山最實際。上週五（ 24日）高海寧呢頭喺旺角朗豪坊行完街，嗰頭就有個身高 6呎 3嘅旅行社太子丘至剛（ Andy）揸架凌志四驅車接送，跟住兩人仲直駛往男家位於深井海韻花園住所，可惜臨門一刻高海寧發現門外有記者，掃興逗留男家 10分鐘就搭的士走人。高海寧要把握時間黐實男友，原來全因太子仔個底有啲花，據知情人士說：「其實 Andy份人都幾花弗，加上佢有 6呎幾高又幾靚仔，一向都好多女埋身，所以高海寧一唔開工都會陪男友，方便實佢呀！」

新牌仔揸寶馬

上完男友屋企，翌日（ 25日）出席活動嘅高海寧突然揸架落地個多月、價值近 30萬嘅寶馬 1系新車離開，仍要貼 P牌嘅高海寧沿途打錯燈又行錯路完全係新手，揸住架寶馬個多月唔揩花都算奇蹟。
週一本刊致電高海寧問她有關摸上男友家同有新車揸，高海寧只透過經理人 Cindy說：「架車係佢呢兩年接 job儲錢買 o架，仲有嗰個男仔（丘至剛）只係佢好普通嘅男性朋友，佢哋冇拍拖呀！」斷到咁正都仲可以話係普通朋友，唔通真係當人儍嘅？

高媽與繼父於女人街擺檔賣銀器，週一本刊問佢繼父阿女有冇帶男友仔畀佢見吓先，繼父只說：「唔知你講乜喎！」同阿女夾晒口供！

健康靠對胸

咪神高海寧有身材亦多負責水着拋胸谷收視，最近終於有套《健康奇案錄》而叫做有啲正經嘢做吓，佢仲話節目出街之後好多人當佢醫生乜都問一餐。
高海寧一心講吓醫學可以洗底，可惜網民嘅注意力似乎仍只集中喺佢嘅 34C身材上，有網友又提議個節目「不如驗吓高海寧對波係咪真好過啦！」想洗底，暫時未得囉！

高海寧於《健康奇案錄》封咪講解醫學常識，可惜網友仍然只集中討論她的外貌和身材。

【轉】有米車手狂冧周秀娜

車見車載 飯局塞錢
有米車手狂冧周秀娜
Face
2010年09月22日

周秀娜早前到日本影內衣品牌 Ravijour目錄，谷盡 32D上圍益日本仔， fit爆身材難怪招到富貴兵。

性感女神周秀娜（ Chrissie）愈撈愈掂，拍戲主持瓣瓣有，早輪仲追住 Angelababy同快過 Janice Man進軍日本拍內衣廣告冧日本仔，成功升呢擺脫 o靚模殼。

升呢娜姐除咗冧到電車仔，仲引到有米老闆，據知 model兼化妝學校 Bio Beauty Culture老闆劉國略（ Paul）亦係娜姐迷，除多次電話約女神飯局，又用價值近 300萬嘅 F430法拉利戰車接送，週日（ 19日）劉的 model公司周年聚餐，既請女神做嘉賓，又送花、拉凳貼身侍候，女神招兵無分階級呀！

冧爆娜姐的有米車手劉國略（ Paul Lau），除愛玩賽車，亦係 Bio Beauty Culture（美妍時尚文化）老闆之一，公司除 model、化妝亦有婚禮統籌，週日喺沙田麗豪酒店舉行五周年聚餐，冧爆娜姐的 Paul Lau當日亦有邀請 Chrissie、 A. Lin同 DaDa做嘉賓，雖然 A. Lin同 DaDa只唱一首歌， Chrissie更只上台做抽獎嘉賓，但 Paul都闊綽出手 5萬溝女神。

送紅酒
據知呢晚由 Chrissie膽拖師妹 A. Lin同 DaDa做晚會嘉賓，合共收 5萬酬金，聚餐當晚老闆兼車手 Paul Lau仲一人送一支紅酒， Paul更主動向 Chrissie解釋紅酒來歷，非常落力。

拉凳仔
聚餐當晚 Paul安排 Chrissie同自己坐，除咗隨身帶備女神寫真博歡心外，其間女神去廁所， Paul就大獻殷勤，連凳都拉埋，好鬼有風度！

自備寫真

貼到實
Chrissie當晚只係上台做壓軸抽獎嘉賓， Paul亦跟到實，全晚採人釘人戰略。

Chrissie對本刊回應說：「家仲未有一個男仔可以鍊贏 Avis，我同阿 Paul只係工作上嘅客戶。」女神出口澄清，怪唔得男友 Avis咁老定！《壹週刊》圖片

聚餐釘實

據知 Paul Lau一直好欣賞娜姐，聚餐當晚見佢攞埋娜姐寫真，知情者說：「一年前 Paul認識 Chrissie後就好冧佢，大讚佢身材好又靚女，成日想約佢食飯， Chrissie都有畀面。不過 Paul仲想再飲嘢， Chrissie就唔想去，大家只係見過幾次面，所以都婉拒咗！」

娜姐兵仔愛賽車

傾慕周秀娜的劉國略（下圖）除了是模持兒兼化妝學校「美妍時尚文化」的股東外，更是本地活躍車手，又孖過郭富城及鄒世龍等參加三級方程式，據知他名下擁有三部法拉利，係超級車迷。

女神戰車
Paul 06年以公司名義買入黃色法拉利 F430價值 280萬，據知佢不時揸戰車返工，非常招搖！

「美妍時尚文化有限公司」於佐敦上海街有 3層 office，公司以一間海外註冊公司名義持有，但據知 Paul Lau亦係老闆之一。

靚車接女神

阿 Paul不時打電話畀女神索佢行蹤，再借故話自己喺附近可以用法拉利戰車車埋佢博見面，可惜 Chrissie以唔知幾時收工婉拒他心意。

飯局約下場

阿 Paul自去年公司周年聚餐成功攞到女神 Chrissie電話號碼後，不時主動打電話畀對方約飯局，飯局之後仲打蛇隨棍上約飲嘢，可惜被女神請食檸檬。

娜姐洗底入屋

09年無綫高層陳志雲曾公開表示 o靚模過分性感意識不良，因而禁止 o靚模在無綫節目亮相。不過家陣娜姐升呢後，早前已獲解封孖住導演葉念琛擔任 J2台《十分試愛》主持，最近更獲無綫邀請在 10月 9日播出的《超級巨聲 2畢業演唱會》中，與曾公開表示係娜姐 fans的吳業坤同台對唱，坤哥週一（ 20日）在電話中說：「我好緊張呀！我一定要問佢攞簽名同合照呀，我驚緊張到俾周秀娜 KO呀。」

娜姐呢年都冇得唞，據知嚟緊有 3套電影等緊佢，又要去日本做新版「電波少女」，年尾仲要返大陸拍套中、港、台合資嘅偶像劇做女主角，要溝娜姐真係排隊登記先啦！

坤哥女神唱情歌

巨聲 2班的吳業坤自稱係女神娜姐嘅超級 fans，佢自爆都有儲女神本寫真集，嚟緊畢業演唱有機會同對方合唱，唔知會唔會學有米 Paul揸住本寫真畀佢簽名呢？

做埋女主角

周秀娜兩年前喺阿嬌套《出水芙蓉》仲係做蛋散，但最近已經榮升女主角，除了跟無綫金牌小生林峯做對手外，仲泊到 Stephy御用導演葉念琛碼頭，成為影圈新寵。

咀到林峯
周秀娜同林峯、楊千嬅擔演新戲《抱抱俏佳人》，戲入面成個月光女神咁，仲同林峯有親密咀戲。

踢走鄧麗欣
由葉念琛執導的愛情電影一直愛用鄧麗欣，但今次新片《婚前試愛》卻飛起 Stephy，改由周秀娜擔正，仲同片中男主角羅仲謙有床戲添！

除咗約食飯，據知 Paul亦會借故打電話畀女神，問清女神行蹤後，再兜架跑車到娜姐附近扮順路車對方，知情者續說：「 Paul做汽車代理出身，佢向來鍾意玩車，周時去澳門、大陸比賽，自己就有三架法拉利，家成日揸住架 300萬法拉利出入，見佢有打過畀 Chrissie話車佢，不過冇次成功，人哋都好有禮貌話好忙未知收工時間婉拒咗！」

女神冇 feel

記者趁晚宴期間問 Paul Lau：「你係鑽石王老五，連續 2年請 Chrissie嚟 annual dinner，佢係咪你心目中嗰類型呀？」他說：「唔好咁講，有乜嘢星期一打畀我啦。」但週一他卻透過另一公司股東陳先生表示不會回應，而女神亦對呢位車手老闆冇乜感覺，她說：「我從來冇坐佢架跑車，近排工作超忙，根本冇時間識其他男仔，加上家仲未有一個男仔可以鍊贏 Avis，我同阿 Paul只係工作上嘅客戶，大家唔好誤會呀！」男友聽到放心晒啦！

姐仔一條心

周秀娜有老闆做兵仔，不過娜姐對身高 5呎 10兼 42吋胸肌的髮型屋老闆兼 model仔男友 Avis一往情深，雖然男友唔係咩富豪級，但娜姐一樣冧爆話：「佢最鍾意錫我隻手，全個人都錫。」其實圈中都有唔少靚女鍾意平凡男，貪佢哋有安全感囉！

飲水飽代表　楊思琦
32歲 TVB花旦楊思琦與同為無綫藝員李泳豪拍拖至今 8年，男友在無綫一直只做閒角，星途黯淡，楊思琦唔理公司反對愈做愈耷，更經常被指要養埋男友。

貼仔代表　 Jessica C.
名模 Jessica C.曾自爆與其巴西奀模 Sergio約會一直 AA制，月前更獨自出錢添新居，等男友可安心喺屋企做住家男。

專一代表　 Janice Man
Janice Man（文詠珊）入行前已與肥仔男友李冠峰拍拖多年，經常被拍到在男友荃灣朗逸峰家過夜。雖然 JM升呢「模 Art」身價飆升，但仍孖公仔出入，專一可嘉。

如何在酒吧追女仔？

如何在酒吧追女仔？