【轉】陪女友睇醫生 葛民輝左右逢源

陪女友睇醫生　葛民輝左右逢源
壹週刊
2010年10月07日

9/17 女友黎韋詩在中環睇完醫生，阿葛揸七人車接走她。

○六開始，葛民輝（阿葛）多次被拍得跟麥當勞高層黎韋詩撐枱腳海邊談心，雖然他只承認對方是「公事朋友」，不過緋聞愈傳愈犀利，阿葛要一度拉埋老婆區祖凝（ Mini）及兒子出席商台活動，做擋箭牌降火。
阿葛四年來左右逢源，記者日前又再發現他開工時間陪黎韋詩到中環睇醫生，反而老婆有病就自己搞掂。據了解，一直三人行的阿葛已下定主意，計劃跟老婆搞清關係，給身邊紅顏知己一個交代。

中環接送

上月中，葛民輝揸住他的黑色日產 Elgrand七人車，在中環皇后大道中附近不斷兜圈，未幾，跟阿葛情侶裝打扮及攞住藥袋的黎韋詩在Ｈ＆Ｍ門口出現，阿葛即校啱時間，停低車接走「好友」。
七人車直駛西環方向，最終於石塘咀停低，二人然後前後腳入茶餐廳醫肚，撐完枱腳，阿葛再揸車送女友返中環。途中，阿葛發現有記者，隨即以龜速慢駛，並突然改往摩星嶺方向駛去，務求撇甩記者，擾攘半個鐘，阿葛終於在中環放低女友，然後踩行油衝紅燈成功走人。

駛到西環，二人刻意分開幾個身位走入餐廳，阿葛更全程耷低頭避開途人目光。

在餐廳食足一粒鐘，二人離開返回中環。

派定心丸

過去四年，不時被拍得跟黎韋詩二人行的阿葛，每次都以「傾公事」做藉口，掩飾一切！據了解，「公事好友」黎韋詩即將被調職往新加坡麥當勞，阿葛於是向對方派下定心丸，表示將有所安排。
「阿葛話同老婆已經冇乜感情，兩公婆亦分床瞓好多年， Mini更加將全副心機放晒喺個仔身上，阿葛仲話等老婆同陪個仔去第二度讀書，佢就會搞清楚大家嘅關係，所以 Randy（黎韋詩）一直係咁等。」黎韋詩身邊人透露。

9/27
老婆 Mini一個人去銅鑼灣睇張惠賢醫生，之後再去 Sogo超市買餸，病咗都無人接送。

緋聞有影響

對於自己老公同「公事好友」黎韋詩枱撐腳及接送對方睇醫生，阿葛老婆 Mini回應冷淡：「有咩事，你問番葛先生啦。」
記者其後致電阿葛，他亦顯然有做好準備：「我知道你哋（記者）影我，日光日白同朋友食飯有咩出奇。（你同黎韋詩究竟係咩關係？）我哋關係平常。（你會接送啲關係平常嘅朋友睇醫生？）係呀，如果你係商台同事，就會知道我平日都會咁做。嗰日我要等埋佢一齊開會，咁佢唔舒服要睇醫生，反正都係要等，唔通我咁冷血叫佢自己去咩？（你同佢不斷傳緋聞，有冇影响夫妻感情？）梗係有，你哋打電話俾我老婆咪有影响囉。（你同太太感情有問題？）大吉利是。」
對「公事好友」呵護備至，相比之下，阿葛對老婆就絕對唔稱得上細心。

下午一點， Mini揸車到南灣接兒子放學，等到三點，母子倆才一起回家。

大細超

就在阿葛陪黎韋詩到中環睇醫生後數日，記者發現頭戴 cap帽，黑衫黑褲打扮的 Mini，自己一個揸車到位於銅鑼灣的恩平中心睇醫生，然後行過去另一邊的崇光超巿買餸，再返轉頭攞車，去湊仔放學。由於仲未夠鐘， Mini坐喺車內等足兩粒鐘，到三點才接到兒子一同返淺水灣屋企。老婆病咗冇人理，仲要買餸湊仔一腳踢，阿葛明顯大細超。

9/26
明知連日來有記者追訪，阿葛做大龍鳳，跟 Mini及兒子到灣仔食「一碗麵」，不過兩夫婦各有各到，阿葛之後也未有跟老婆返屋企，揸七人車離開。

軟硬即將在草蜢演唱會擔任嘉賓，阿葛日前出席記者會為對方造勢。

去年阿葛為林海峰棟篤笑做嘉賓，在後台突然暈倒，最後送院，他亦搞笑地將留院照拍低給觀眾欣賞。

來往四年

與正印妻子 Mini結婚 17年，葛民輝一直將妻兒收得密密實實，家事低調處理，直至 06年爆出與麥當勞高層黎韋詩來往密切，至今仍多次被傳媒撞破。

06年 2月
阿葛被拍到驅車載黎韋詩到聖士堤反灣，夜闌人靜，二人在車廂內望海談心。

06年 7月
二人到四季酒店密會，至晚上十一時才雙雙步出酒店，驅車離開。其後阿葛被傳媒追問二人關係時，他肉緊地維護緋聞女友，叫記者「唔好搞佢米飯班主」，又搬出老婆擋駕，堅稱老婆無嬲，並一早認識對方。

06年 8月
阿葛罕有地帶同妻兒出席麥當勞活動，黎韋詩亦在場，雙方表現避忌，招呼都無打。

08年 11月
二人齊齊到大坑大牌檔午飯，爭取時間短聚大半小時，便各自驅車離開。

09年 3月
有傳媒拍到阿葛親自接載黎韋詩往大角咀打邊爐消夜，之後再驅車環遊港島至凌晨時分。
合作無間
讀設計出身的葛民輝，除了做 DJ外，自組設計公司 Double X Workshop和自家品牌 4a出品潮人服飾，百足咁多爪的葛民輝，近年經常跟麥當勞合作。

設計 T恤
有自家潮服品牌的葛民輝， 04首次跟麥當勞合作，為麥記員工設計 T恤制服。阿葛將年輕潮流元素，用七種顏色配以 32個不同表情注入 T恤中，生產量只有三萬件。

搞節目
06年聯同商台跟麥當勞合辦《麥當勞 903 Fantastic Plug流行示範》節目，當中有不少歌手如陳奕迅、陳慧琳等參與，一連四十個星期日播出節目。

做慈善
06年開始，阿葛經常參與「麥當勞叔叔之家慈善基金」慈善活動，如慈善籃球賽、又獲委任為「麥當勞暑期青少年大使」領隊，於 08奧運期間帶隊做義工。

開音樂會
「軟硬天師」 06年重組開音樂會，獲麥當勞贊助外，阿葛與林海峰連續兩年為「麥當勞世界兒童日音樂會」任表演嘉賓。

拍廣告
經常為麥當勞廣告做旁白的阿葛和林海峰， 08年以「軟硬」的形象拍麥當勞新年廣告，又推出宣傳精品， 09年兩人再與陳奕迅、容祖兒同拍「 24小時麥麥送」服務電視廣告。

設計 T恤

搞節目

做慈善

開音樂會

拍廣告