【轉】港女扮韓妹 A貨少女時代抄到開騷 ﹝有A貨跳舞片！！﹞

港女扮韓妹　 A貨少女時代抄到開騷
Face
2010年09月29日

A貨「少女時代」連制服同 pose都跟正版一樣，成隊除咗一個讀緊 IVE外，其餘全部係中學生，最索嗰件係排頭位嘅 Aya，算有市場策略。連死忠「少女時代」歌迷會（ SONE）成員阿倫都說：「佢哋 ok o架，跳得幾好，唔會討厭佢哋嘅！」

上年韓國少女組合 Wonder Girls憑一首〈 Nobody〉 hit爆，連福祿壽都爭住跳佢哋隻低能舞，不過 WG得頭威，未夠兩年已經俾死敵「少女時代」踢低晒。
「少女時代」氣勢勁，最近喺香港亦有隊 A貨組合全套制服抄到足，最叻係班女無師自通跳「少女時代」舞步亦似模似樣，仲俾 apm、 megaBOX等商場睇中邀請表演。最衰家陣冇咗《殘酷一叮》，唔係上埋電視發到圍呀！

• 互動片段
  
  A貨少女時代抄到足
  
  
  

查實呢隊 A貨「少女時代」隊名叫「 Sweetness」，全隊有 15個 90後 o靚妹輪流上陣扮「少女時代」，雖然佢哋次次出騷都係咪嘴齋跳唔開聲，不過勝在舞步同造型神似，一樣被各商場同亞洲遊戲展邀請做表演嘉賓。

抄埋封面
A貨乜都抄到足，連「少女時代」 09年嘅大碟《 Genie》封面都抄埋，但當然冇堅版咁多 details位。

正版

「 Sweetness」將早前喺亞洲遊戲展嘅表演短片放上 YouTube，唔少網友讚，仲有人話：「跳得好睇過李蘊同劉欣宜！」

正版
「少女時代」唱新歌〈 Oh!〉時所着的數字衫加白色熱褲， A貨亦抄足 8成。件數字 tee係專登搵人印，唔使$100。

周秀娜經理人 Roy：香港好少呢類組合，佢哋呢隊雖然高矮肥瘦不一，唔排除都有自己 fans嘅，其實入面有幾個人都幾 sharp，其中以 Aya最正，可能有市場，但有啲應該去『修身堂』走番轉囉。

貼錢出騷

呢隊 A貨港女頻頻出騷，但表演全部冇錢收，最多只有少量車馬費，平時仲要貼錢租場地練舞同訂做制服。成員 Yuki話：「出騷冇錢 o架，我哋全部都仲讀緊書，一放假就約出嚟練舞，就算喺屋企都喪煲 MV！」要讀書又要扮 A貨，當中梗有家人唔贊成，另一成員 20歲的 Miyuna說：「阿媽覺得我嘥好多時間跳舞，所以今日出 show都唔敢畀屋企人知！不過我覺得成班人做到一件事好有成功感，好滿足，所以都會 keep住扮！」
扮得咁落力，應該又係另一班發明星夢少女組，但 18歲的團長 Misako則堅持說：「我哋好鍾意外國組合，又鍾意跳舞，所以先組嚟玩吓啫，試過出騷後有星探搵過我哋，不過我哋冇考慮，所以連名都唔記得喇，組合喺香港好難紅，真係有人捧先算啦！」
連組合難撈都諗埋，定係想自己殺出重圍先？

港女爭跳韓舞

Rick

韓風吹得勁，唔少港女亦學跳韓國舞，曾獲無綫《財經透視》訪問嘅排舞老師阿 Rick淨教學生跳 MV舞都月入 5萬，佢話：「我 8堂收$640，最多人學跳 Super Junior同『少女時代』嘅舞，幾乎全部係學生，大部分學嚟自娛，好少諗住表演！」

A貨貼錢排練

上週四（ 23日）， 9位「 Sweetness」成員為晚上的屯門區議會中秋晚會表演綵排，租場錢自己畀，而主辦單位說：「係我哋主動搵佢哋嘅，上次喺 apm見到佢哋覺得好 impress！」

「少時」允兒最紅

喺「少女時代」中，以允兒人氣最高，允兒除咗單飛拍廣告， 08年擔正做主角的韓劇《你是我的命運》更成為韓國最高收視劇集，在港 fans亦最多。反而隊長金泰妍（右一）則只專心唱歌，冇乜其他搞作。

右四

允兒

WG急跌

信和另一專賣日韓唱片的「 Echo」老闆亦說：「《 Two Diffenent Tears》冇乜人買。」

08年紅極一時嘅 Wonder Girls憑一首〈 Nobody〉衝出亞洲，成為當年銷量最高韓國女子組合，估唔到今年 4月出的新碟《 Two Diffenent Tears》直線仆直，喺南韓最具代表流行榜《 SBS人氣歌謠》未攞過冠軍，新碟喺香港銷情一樣不濟，據信和專賣日韓唱片的「鋪頭仔」負責人胡先生說：「 Wonder Girls去貨好慢，一日都賣唔到一隻，反而『少女時代』就斷晒貨，連韓國都冇貨返。」