【轉】新版《紅樓夢》 愈三級愈收得

新版《紅樓夢》　愈三級愈收得
壹週刊
2010年09月30日

新版《紅樓夢》播咁耐俾人鬧足咁耐，但收視依然攞冠軍，導演李少紅仲話無論邊個拍都會成為箭靶，事關每個人心目中都有自己嘅《紅樓夢》。

歷時三年投資 3億人民幣拍攝嘅電視劇新版《紅樓夢》，雖然全省各地收視全部攞冠軍，但話晒《紅樓夢》係曹雪芹嘅經典名作，唔少「紅迷」對於導演李少紅，將哀怨愛情大悲劇，拍成妖氣沖天嘅古裝版《 Sex And The City》，認為李導演嘅拍攝手法，直頭係對傳統文化一種卑劣嘅「強姦」。
劣評如潮，但劇組強調，開拍前請咗 20位「紅學」專家把關，絕對跟足原著，仲搵嚟奧斯卡最佳美術指導葉錦添，為三位主角「寶黛釵」重新設計新造型。
不過視迷完全唔 buy葉錦添嘅設計，覺得女主角嘅髮型似粵劇花旦，服裝太多喱士花，以為睇緊《白蛇傳》，加上配樂似《聊齋》，搞到《紅樓夢》似《青樓夢》。除咗 image出事，仲將原本點到即止，用文字加幻想空間衍生出嘅情慾場面，變成畫公仔畫出腸嘅二級半床戲，視迷更嚴選 10大露骨鏡頭，形容為國產劇情色戲里程碑嘅大突破。一句講晒，無論係導演眼高手低又好，視迷雞蛋裡挑骨頭都好，聽古最忌駁古，唔通走去投訴周星馳，點解唐伯虎識得用天山雪蓮秘製含笑半步釘咩！
由葉錦添做美指，視迷大鬧粵劇花旦頭太舞台化，寶釵件衫又太多 lace風塵味濃，於是以「黛玉滿頭銅錢　寶釵遍體蕾絲」指責葉錦添破壞晒兩位女主角純情 image。

少女版黛玉

少女版寶釵

除咗床戲特別多，穿崩鏡頭都唔少，最離譜係講成年版寶玉同黛玉泛舟湖上，小艇兩旁居然出現防撞車胎，既然車胎都有，寶玉同黛玉下次談情可以遊車河。
十大露骨戲當中，以春夢醒來嘅寶玉，求襲人同佢「曳曳」最點到即止，只係影住佢哋吹熄蠟燭瞓上床，床邊紗帳隨風飄揚交代，相反，賈瑞夢見王熙鳳除剩肚兜挑逗嘅場面，加埋一把女人聲淫叫做配樂，電視劇嚟講鹹到出晒位！

賈瑞高潮嘴

寶玉曳曳

根據原著，黛玉葬花死得淒美，但新版黛玉，疑似全裸露膊伏屍床上，視迷形容呢幕叫「黛玉裸死」，仲將佢漫畫化，話曹雪芹無眼睇！

新版《红楼梦》为何骂声一片？