斷正 Boxing day食 G.E.M. 林宥嘉發狂打人
Face
2010年12月29日
你不要這樣！(真實對白)
我不要保持風度！(真實對白)
斷正起火︰平時唱歌深情又溫柔，但被記者撞破即發怒強搶相機的林宥嘉把 G.E.M.亦嚇親， G.E.M.即時繑實男友手臂希望令他冷靜：「你不要這樣。」
聖誕佳節凍冰冰，人人想攬實另一半人肉暖爐保溫最浪漫， 19歲巨肺 G.E.M.都唔例外， boxing day終於等到男朋友仔林宥嘉秘密抵港陪伴，食飯睇戲拆禮物一氣呵成！
可能二人行埋一年未有準備斷到咁正，加上首次被記者撞破拍拖好事，林宥嘉突然發難拉扯記者追打，又發狂想搶奪相機，護花心切 5呎 3的林宥嘉變猛男。
其實拍拖又唔係偷情，兩個唱得小情侶外形實力都襯到十足，以一敵四搞到有損傷報警又嚇親女友仔，林宥嘉冷靜咗就發覺自己過分嘞。
今年初，首次推出國語專輯的鄧紫棋長駐台灣三個月錄音加宣傳，與星光小天王林宥嘉傳撻着，不過男女雙方都態度一致玩收埋，見面偷會又夠小心，相戀將近一年都係有聲冇畫，至週日（ 26日） boxing day下午出席完公開活動的 G.E.M.極速奔家，到晚上 7時，終於看見落了妝戴上眼鏡和口罩的小巨肺拖實一早在鄧家等候的林宥嘉從荃灣寓所步出過節，親密關係首次斷正。
溫馨拆禮物
下午做完公開活動時，笑到見牙唔見眼的 G.E.M.（右圖） boxing day跟男友見到面，就算只喺荃灣行街冇貴禮物冇名店， G.E.M.一臉冧樣，一對小情人戴埋情侶眼鏡仲全身黑，非常襯。
你（林）先放開！(真實對白)
女友嗌停︰大學讀體育及休閒系的林宥嘉蠻力扯記者相機帶時， G.E.M.高聲勸阻話：「你先放開好不好！聽我說好不好！」混亂中記者被抓傷手背。
你們不要再拍。(真實對白)
怒搶相機︰記者和 G.E.M.力勸，亦無法平復火爆的林宥嘉，攝影閃光燈亦因此跌爛。
忽然後襲︰一輪拉扯後，為在女友面前表現英勇一面，身材瘦小的林宥嘉以一敵三， 5呎 3都變小巨人，忽然從後撲向記者想再搶另一記者攝影機。
我不信你們（香港人）這套！(真實對白)
拑手批踭︰搶相機事敗，林宥嘉轉攻另一位手持攝錄機的本刊記者，其間施拑臂批踭必殺技，記者焗住硬食一招。
你相不相信我！(真實對白)
報警、報警、報警(真實對白)
拉埋勸交︰ G.E.M.終於拉埋林宥嘉一邊，勸佢先上寓所自己善後，「你先上去，你相不相信我！」但林宥嘉依然企硬向 G.E.M.大嗌：「報警呀！快點呀！」
警察調停︰直到警察和香港唱片公司人員到場，林宥嘉才平靜下來，願意賠償記者損失，雙方不作追究。
偷拆禮物
上月才推出新碟《 My Secret》的 G.E.M.近月一直忙於為新碟宣傳，人人以為她與林宥嘉上次見面已經是四個月前的「新城國語力頒獎典禮」。事實上即使身處兩地、工作繁忙亦無阻這對小情侶的熱情，知情者說：「佢哋成日瞞住雙方唱片公司，爭取時間偷會，月初 G.E.M.先抽時間去咗台灣兩日一夜見男友，今次林宥嘉啱啱平安夜（ 24日）先喺上海開完演唱會，返台前咪途經香港同 G.E.M.一齊賀聖誕囉！今次連佢公司都唔知 o架！」
樹熊掛頸
相戀一年聚少離多，難得見面二人還是像熱戀男女一樣，似足連體嬰。
入行前初戀男友及林宥嘉之間， G.E.M.曾經與有嶺南 Eason之稱的 Aaron拍拖，去年分手。
發狂台男
在 boxing day出席活動時， G.E.M.仍公開說：「聖誕同林宥嘉冇見面、冇短訊、冇送禮物，爸爸、堂哥就係男伴。」估佢唔到原來男友一早在家久候，二人的拍拖行動都集中在甚少記者巡視的荃灣區內進行，加上二人戴上眼鏡和口罩、穿起大褸和牛仔褲極平民，即使兩人全程又拖又攬又咀，肆無忌憚一樣成功隱藏於荃灣街坊堆中。拍拖期間兩人鋸完扒再睇埋娜姐激片《婚前試愛》，又在附近公園連體漫步足足 15分鐘，當兩人正準備上樓之際，冷不防記者上前拍照的林宥嘉，竟忍唔住出手搶相機。
成熟解放
出道兩年的 G.E.M.，除了巨肺唱得，亦出晒名身材好。
同場偷望
異地戀難得見面，今年 8月二人一同出席「新城國語力頒獎典禮」，林宥嘉忍唔住經常偷望 G.E.M.。
報警認衰
其間努力護花的林宥嘉表現熱血，又批踭又扯相機一輪推撞，嚇到本來企開一邊的 G.E.M.亦忍唔住高叫：「你冷靜點！」林宥嘉卻邊喊：「這是私人事，我是台灣人，我來做音樂，不想上你們雜誌！」又一邊提出要報警， G.E.M.情急下再說：「你先上去（ G.E.M.寓所），你相不相信我！」但林宥嘉依然充耳不聞，結果擾攘半小時，直到警方到場、其所屬香港唱片公司 Wow Music負責人到場，林宥嘉才被勸服。
冷靜過後，週一 G.E.M.說：「我係嚟做音樂嘅，希望大家淨係留意番我音樂上嘅嘢啦。」而林宥嘉則透過經理人回應：「他上週六、日在大陸演出，只是路過香港去找好朋友而已，他很欣賞她（ G.E.M.）的音樂，兩人在音樂上也有一些交流，當天攝影師突然衝出來，他被嚇到，才會有那些反應也是基於本能吧！」咀晒都係好朋友，其實音樂人都可以拍拖，唔使繼續講大話啫！
我來做音樂。(真實對白)
夾埋口供︰林宥嘉自稱「我來做音樂！」，週一（ 27日）， G.E.M.亦跟足口風話：「我係嚟做音樂，希望大家淨係留意番我音樂上嘅嘢啦。」
希望大家淨係留意番我音樂上嘅嘢啦。(真實對白)
平民價$721 G.E.M.畀晒錢
G.E.M.同林宥嘉由晚上 7點於荃灣麗城花園女方寓所出發，行街食飯睇戲 5粒鐘遊勻荃灣市，真正只係使咗 721蚊，仲要全程由阿 G.E.M.埋單，呢個女友識得過呀！
19:00 Start
晚上 7點兩人手拖手由女家荃灣麗城花園步出，展開浪漫 5小時街頭漫遊。
19:40
Outback鋸扒$589︰兩人由寓所搭的士到愉景新城的 Outback鋸扒， 2人一碟沙律加兩客牛扒再搭兩杯飲品，盛惠$589，由女友 G.E.M.埋單。
21:40
圍頸巾︰食完飯臨出商場， G.E.M.仲好細心咁幫男友圍條頸巾，估唔到 G.E.M.人仔細細又識做廿四孝女友本分喎！
22:00
睇激片$132︰食完飽飽，小情侶搭的士去到荃灣另一商場荃新天地 II期的嘉禾戲院睇《婚前試愛》，又係阿 G.E.M.用信用咭預先網上訂飛畀錢！
《婚前試愛》有羅仲謙同周秀娜肉搏連場，睇戲期間兩人不時頭黐頭，佳節流流揀啲激戲睇， G.E.M.鬼馬喇！
23:20
公園漫步︰小情侶之後落咗去商場附近公園漫步，其間繼續連體攬頭攬頸，行公園咁浪漫，真係 19歲先會做。
23:40
忍唔住咀︰行完公園等的士返歸期間， 19歲 G.E.M.終於忍唔住當街攬住男友條頸就隔住口罩咀落去，少女情竇初開，係好難忍嘅！
台男多躁底
23歲情歌王子林宥嘉變臉發狂未算異數，其實包括周杰倫在內不少台灣情歌天王，台上深情台下愛蒲愛飲又火爆，狼過啲香港男星好多 o架！
積犯周董
在樂壇呼風喚雨的周杰倫一直是中港台記者追訪頭號目標，周董痛恨狗仔隊作歌唱衰之餘，多次在被追訪途中與記者發生推撞。
花心陶喆
緋聞多到爆又愛嗒奀茄，陶喆 08年初爆醉酒街頭連吻兩女，又因醉酒傷人兼拒捕，事後要開記招道歉。
逸臣射尿
《海角七號》男主角范逸臣愛飲眾所周知，經典作是醉酒當街小便、宿醉後更連上門叫起身的經理人都拳頭侍候。
.jpg)
.jpg)
.jpg)
.jpg)
.jpg)
.jpg)
