少年食神變騙神 食埋高海寧
壹週刊
2010年12月16日
我節目叫食完唱通街！（設計對白）
所以我賴嘢！（設計對白）
為無綫主持《為食一條街》、外號「少年食神」的 Michael（林澄光），憑住肥頭耷耳外形，及一副識食格，成功入屋。不過鏡頭前人見人愛兼相識滿天下的他，在朋友眼中卻另有真相。「少年食神」唔單只識食，更憑三寸不爛之舌，專呃老友錢，唔熟唔食，受害名單中包括跟他 friend過打 band的森美，十萬蚊血汗錢幾乎血本無歸！
「少年食神」原來係「少年騙神」，《為食一條街》的 Michael，更加出名「完唱」。據知他最愛吹噓自己食盡城中女星，其中晚晚陪佢周圍搵嘢食的拍檔高海寧，亦慘被 Michael唱為速食「便當」。
扮富豪追女
「少年食神」 Michael唔單只晚晚在鏡頭前自認識食，鏡頭後更愛向朋友炫耀自己食盡無數女星，凡跟他交往過的異性，全都成為他口中的速食「便當」。而最新金榜題名的，包括 36D無綫新咪神高海寧。
追女平常事，但視女如食店一樣完唱就認真「無品」，據知連少爺占同 Donald都睇唔過眼，早前幫《為食一條街》做嘉賓，兩個故意在鏡頭前「求證」 Michael。少爺占同 Donald齊質問：「聽講你之前帶高海寧去美國食嘢！」擺明玩嘢，吹水天下無敵的 Michael當堂打個突，繼而扮聾過骨，反而被食神 Michael背後唱爆的高海寧卻懵然不知，仲傻頭傻腦猛咁問：「講咩呀？」
據知在《為食一條街》開拍初期，食神 Michael確實對咪神生螆貓入眼，繼而使出追女吹噓招，討高海寧歡心。
Michael身邊友人爆料：「佢早排溝高海寧，又係用埋同一條橋，同人講佢好多部車，話送部俾高海寧，查實啲車係佢堂阿哥。有次車住高海寧途經大坑道，又話嗰頭好多樓係佢老豆剩落。其實佢只係得何文田俊民苑一個居屋單位，好多女知佢充闊佬之後掉頭走，佢可以厚面皮到同我哋講食咗邊個邊個，最近又話食咗高海寧，仲唱到好易食。」未摸清「少年騙神」真面目的高海寧，近日在微博大晒親手做給 Michael的蛋糕，顯然中晒計。
據知少年食神 Michael唱高海寧一事，傳到少爺占及 Donald耳中，早前他倆上其飲食節目擺明玩嘢，在鏡頭前忽然問 Michael係咪帶高海寧出埠，暗示佢係咪食咗人！
轉過頭 Michael當住兩個嘉賓氹高海寧，話有邊個男人唔鍾意佢，搞到女嘅鬼咁冧，但睇穿 Michael溝女屎橋嘅 Donald就忍唔住偷笑！
愛吹噓又識冧人的 Michael，將拍檔高海寧氹得鬼咁開心，就算拍罷飲食節目，仍愛孖住 Michael去覓食及接受訪問，不知對方在背後對她完唱。
早前森美答允 Michael之邀，在他的飲食節目亮相。表面上仍是朋友的他們，據知私下因呃錢傳聞，令森美對食神 Michael心存介蒂。
收回冧女車牌
唔止無口德，食神 Michael更有鋪追女不遂，強行收回冧女禮物劣行。據知年多前，他一度力追梁敏儀，除每日至少一 call，還使出強項，帶她飲飲食食討歡心，吹噓在元朗擁有過百部車的他，更送上至愛的幸運車牌給梁敏儀。知情者說：「佢追梁敏儀時，送咗個 lucky車牌 CD1009俾佢，但千零蚊轉名費都側側膊唔俾。後來追極唔到手，兩個月後就話攞番個牌。」
事後記者致電梁敏儀，她承認收回車牌一事，她說：「佢之前係話俾我，不過轉頭話要俾朋友用，咁咪俾番佢囉！（聽講係因溝不遂收番？）朋友啫，不過我哋而家無聯絡！」
Michael曾將佢嘅 lucky車牌 CD1009當禮物送俾追緊嘅梁敏儀，但之後因失手食唔到入口，即向梁敏儀攞番車牌，掛回自己仿古董車上。上週這個回收溝女車牌曾出現他的飲食節目中。（《忽然 1周》圖片）
森美縮沙拒合股
森美得知少年食神係騙神後， Michael雖全數俾番晒對方，但未幾 Michael就沒跟森美一起主持商台節目。
食女「無品」，更當朋友係「羊牯」。據知兩年前 Michael經 EO2認識商台主持森美，從此努力碼實大碼頭，後來森美安排他在逢星期六晚開咪主持吹水節目《公子會》。獲森美信任後， Michael開始使出伎倆，向對方吹噓郭富城、葛民輝熱捧的灣仔王子酒店東來居火鍋店，他是大老闆之一，氹森美注資十萬入股，實情他只佔火鍋店百分之五股份，屬掛名股東。直至數月前森美才發現真相，加上收到風 Michael有呃錢前科，森美即打退堂鼓，搵 Michael面對面講數要求退股。知情者說：「森美聽到 Michael呃人嘅事，即刻約佢出嚟當面質問， Michael唔想醜事揚出去，所以答應退還十萬俾森美，之後 Michael無再做森美嘅節目。」
呃 EO2經理人
Michael叫森美落疊注資的火鍋店「東來居」， Michael（林澄光）是當中佔最少股份的一個，只得 5%。
至於觸發森美縮沙，原來與 EO2經理人文狄成為騙神受害者有關。知情者續說：「兩年前澳門有間叫囍館火鍋店開張， Michael同文狄講佢有份，叫對方夾錢一齊做股東，文狄夾五萬，落疊之後，兩年嚟生意係賺定蝕都無交代，又唔覆文狄電話。有次文狄撞到囍館班大股東，細問下先知 Michael由始至終只係夾咗兩萬蚊咁少，班股東仲踢爆 Michael幫佢哋入貨買牛肉都從中食價，諗住相識一場先無追究。」
森美：叫佢退番錢俾我
撕破少年食神真面目後，本週一（十二月十三日）森美在記者求證下承認此事，他說：「雖然夾錢之後一路都話生意未回本，但我都好信佢。直至聽到關於佢之前呃錢傳聞，我咪同佢講：『為表示你清白，不如退番晒啲錢俾我。』咁佢又好爽快答應，將十萬蚊俾番我！」記者問森美信唔信 Michael呃錢傳聞？他答得巧妙：「總之佢肯退番錢俾我就算，唔理佢係咪呃人錢！」
文狄：幾萬蚊睇清人格
跟 Michael相識超過五年的 EO2經理人文狄（紅圈者）比森美還早陷入食神圈套。而 EO2的 Eddie（黃衫者），更公然指他是高級古惑仔。（《蘋果日報》圖片）
至於 EO2經理人文狄，承認被 Michael呃錢，且不屑的說：「蠢咗一次唔想再蠢第二次，嗰幾萬蚊當睇清楚一個人嘅人格。」
Michael臭名遠播，與他曾是好友的 EO2成員 Eddie，更加一提 Michael就扯火：「我有聽過佢呃人錢嘅事，因為人哋有單有據無屈佢。我只可以講佢係高級古惑仔，把口呃得吓人。睇見佢做節目就火滾，佢介紹白田邨嗰間茶餐廳，土瓜灣食雲吞，話自己由細食到大，查實嗰啲係我哋班 friend幾年前帶佢去食咋嘛！（有無聽過佢四圍唱食咗高海寧？）點止呀，佢唱過好多個啦！不過唔方便講係邊個！」
否認錢銀瓜葛
認識 Michael的李思蓓，亦公開寸他：「佢講嘅嘢好多都同事實不相符！（你有冇俾佢唱過？）唔係我，不過佢若然驚覺自己有妄想症就請揚聲，我會介紹醫生俾佢。」（《蘋果日報》圖片）
善於辭令嘅 Michael起初否認與森美的錢銀瓜葛：「我同森美係好兄弟，無發生錢銀問題，大家合作無唔開心。（森美都話要求你退番十萬俾佢喎！）森美咁講咩？我係退番錢俾佢，仲係現金咁俾！（點解要退？）佢話要用錢，想攞番啲錢周轉，咁咪俾番佢先。」明顯跟森美說法有出入！至於 EO2經理人文狄的瓜葛，他以四兩撥千斤應付：「謠言啫，我俾番佢啦！所有人都收番晒啲錢！（點解成日同朋友夾錢做生意，最後退錢收場？）吓……我開門做生意，總之對得住天地良心。」
至於有傳他對高海寧「完唱」， Michael同樣否認：「呢啲係花邊新聞，我邊有咁講！」而高海寧對 Michael完唱嘅傳聞，她反應愕然：「吓，即係咩？呢啲唔係事實，我唔信佢咁講！」
36歲認少年
230磅的林澄光，年約 36歲，屋邨長大，讀陳瑞祺喇沙中學，自稱畢業後接手父親的工程公司。少爺仔要到地盤日曬雨淋，始終捱唔慣，於是轉做光岡日本車代理。鍾意親自揸車安排傳媒拍宣傳照，因而結識唔少圈中人包括森美、王菀之等。 01年開始在報紙雜誌寫飲食稿，同時亦拍住森美於 903節目《公子會》中開咪，任嘉賓主持講飲講食，知名度大升。中年肥仔靠把口變成「少年食神」，今年仲「升呢」在無綫擔正飲食節目《為食一條街》，日日揸靚車載靚女周圍歎好嘢，擺出一副識飲識食姿態。
（《蘋果日報》圖片）
他有份投資的另一間位於澳門的火鍋店，有傳他曾因幫店鋪入貨買牛肉被發現食價，一度引起其他股東不滿。（《蘋果日報》圖片）
.jpg)
.jpg)
.jpg)
.jpg)
.jpg)
.jpg)
