【轉】Carol殺到嚟 Chrissie開胸任錫

Carol殺到嚟　 Chrissie開胸任錫
2010年11月24日
Face

由模界轉攻影壇的神級 o靚模 Chrissie，單係呢兩個月已經有《抱抱俏佳人》同《新殭屍戰士》上畫，嚟緊聖誕仲有一部由娜姐擔正的《婚前試愛》，宅男保證睇到飽。
拍過《獨家試愛》三部曲的導演葉念琛，新戲除咗繼續講 80後愛情，仲會勁賣肉。戲中娜姐同羅仲謙臨結婚前各自偷食，分別同萬寧哥哥沈志明及浸大 E神 Carol搞埋。兩大女神同場硬撼， D奶 Chrissie身材雖然唔夠 E神 Carol勁，但勝在夠搏夠放，肯打開心口　萬寧哥哥當人肉枕頭，又同巨胸謙床上肉搏。要壓住上位女配角，唔搏啲點得先？

萬寧哥哥竟然話拍呢場戲冇感覺，「當晚拍咗好多個 take，大家都好攰，拍到冇晒感覺！」佢仲話臨拍前特登做 push up谷肌，可以同羅仲謙對撼。

用開 Stephy做膽的葉念琛，唔知係自己拍到悶定驚觀眾睇到厭，新戲《婚前試愛》決定棄用微波愛將，轉搵乳神級的 Chrissie（周秀娜）同浸大 E神 Carol（楊梓瑤），同場加送巨胸羅仲謙， o靚界通殺。

唔及娜姐

Chrissie戲入面任對手壓胸啜咪，而且件件衫都有咁低得咁低，狂晒事業線，反而 Carol就相對保守，只得一場同巨胸謙的梳化親熱戲，單計賣肉程度， Carol似乎輸蝕畀娜姐。
第一次拍戲就撞正 Chrissie，仲讀緊書的 Carol就話唔怕比較，「其實唔一定露得多先叫正，我個角色都好立體，又會喊又會鬧人。不過我自問仲未 ready好似娜姐咁放，始終我第一次拍戲，而且好難向屋企人同男友交代嘛！」

肉緊咀爆
飾演攝影師嘅萬寧哥哥，戲入面同三唔識七嘅 Chrissie酒後亂性。原來佢同 Chrissie早年做 model時已識落，所以拍兩場床戲都冇尷尬。

大佐啜仔
近期扮向山大佐 hit爆嘅金剛（左）同洪天明一齊做羅仲謙班損友，兩個仲唔覺意互咀，擺明搞笑。

Chrissie同正印男友羅仲謙臨結婚前先嚟鬧交，係就係有場床戲，不過 Chrissie嘅肉緊程度似乎冇同萬寧哥哥嗰陣咁勁喎！

唔恨啜咪

四角混戰，戲入面無論男女都要露。飾演 Chrissie男友的羅仲謙，唔只同 wet妹 Carol玩三夜情，喺屋入面一路食早餐一路啜爆，亦會同正印 Chrissie有男上女下床戲， 40吋巨胸力壓 32吋 D奶。
有幸同女神纏綿，但怕醜仔竟然話寧願錫嘴都唔肯錫胸，「我喺戲入面會同兩個女角錫吓嘴同頸，我覺得已經好激喇！如果你要我錫胸，我會即刻問導演可唔可以唔掂啲咁敏感嘅部位，我真係唔想啜喎！」女神面前都唔吼，飛機場傅穎可以放心晒啦！

梳化辣㷫
Carol喺戲入面最多只係露吓背，呢幕錫頸親熱場面已經係佢嘅極限，「拍呢場時導演有要求清場，我着咗件 T恤，但入面就真空，所以我要狂黐牛皮膠紙防走光 o架！」

Carol話羅仲謙有 40吋巨胸令佢好有安全感，「拍床戲時好在有佢遮住我先唔會穿崩咋！」

o靚界必睇　葉念琛：有史以來最激

擅長拍後生仔愛情小品的葉念琛，最出名係由方力申同鄧麗欣擔正的「愛系列」。 06年的《獨家試愛》收 800萬，之後《十分愛》同《我的最愛》都收過千二萬，港產片嚟講真係算飲得杯落。
今次唔搵愛將轉搞 o靚模，葉導演話貪佢哋話題性大，「 Chrissie形象性感，女觀眾又欣賞佢敢言有個性，好適合呢套咁有話題性嘅戲。佢今次拍呢套戲，應該會係佢有史以來最激嘅一部！」