【轉】林欣彤：「我好辛苦！」

林欣彤：「我好辛苦！」
壹週刊
2010年09月30日

即使完成航空及客戶服務課程，她仍會繼續做歌星。

林欣彤，憑《 A.I.N.Y.》一曲一夜成名，順理成章奪得《超級巨聲》冠軍，隨之而來是連串的訪問、拍照、宣傳活動等，報章上幾乎每日都看到她的消息。
這個二十歲 o靚妹，由一個平凡的 IVE學生，走進娛圈這個花花世界，面對這突如其來的轉變，對一直渴望成為歌手的她，原來一點也不好受，「呢種感覺，我覺得好辛苦。」

俾人監視

才剛出道，已有人拎番她初參加《超級巨聲》時的娘樣作比較。

來做訪問前，林欣彤剛剛於荃灣出席完活動，坐下來整頭化妝時，本來跟髮型師、化妝師有講有笑，但很快便聽不到她的聲音，望過去，只見她閉起雙眼，多半是睡着了，問她攰嗎？她答得快：「攰呀！就今個禮拜，我已經唔記得做咗幾多個訪問。」現在一個星期上四天課，其餘時間均被填得滿滿，最辛苦的一日，試過由上午六時多起床工作，一直至凌晨兩時才回到家，化妝整頭時睡着，實屬閒事。「化妝時個頭 fing嚟 fing去，不過化妝師好錫我，幫我化眼時，佢唔會叫醒我，就直接用手撐開我對眼，哈哈。」
自小憧憬做歌手，但隨着年齡增長，發覺這個歌手夢離自己越來越遠，唯有放棄，直至參加《超級巨聲》，這一團火又再次燃起。成功跑出，夢想成真，將她帶入一個跟她日常生活截然不同的世界，當然還附送被狗仔隊追訪。
「我冇諗過咁誇張，差唔多日日都俾人跟住，呢種感覺，我覺得好辛苦、好大壓力。」壓力大到要以喊來發洩，「覺得好似成個世界變咗，特別係過咗比賽之後頭一、兩日，好多記者喺屋企附近等，有種長期俾人監視嘅感覺，我喺度諗：『死啦，係咪以後日日都係咁 o架啦？』。」還未真正大紅，就已經話：「有時都會想人唔認得我。」幸好過了頭幾天情緒已穩定下來，「我又控制唔到佢哋（狗仔隊），我只能夠控制自己嘅心情同諗法。」

歌手 VS 空姐

父母疼錫林欣彤，最怕她會因為負面新聞而不開心，「難聽嘅說話一定有，但都係喺網上，好似話唔想聽到我唱歌、我把聲好難聽等，睇完會唔開心，但而家一有 hard feeling時就會唔睇。」父母經常着她將不快說出來，但她的傾訴對象卻不包括父母，「始終唔想佢哋太擔心。」父母亦不會多問，以行動支持，母親經常煲湯水、父親則幫她按摩腰骨，「之前喺樓梯跌過兩次、喺平地又跣低過兩次，四次都傷喺同一個位，而家做嘢又成日都要著高踭鞋。」比她小五歲的弟弟反而是傾訴對象之一，「我哋每晚瞓覺前都會傾偈，佢會講佢和同學啲嘢，有時又會講吓我哋隻狗仔兜兜……不過呢排因為做嘢好忙，所以都傾少咗。」
除了贏得比賽，父母更想她完成在香港專業教育學院（ IVE）修讀的航空及客戶服務課程，而她自己亦希望兩邊兼顧。「諗住讀完書後第一份工就去報空姐，所以就報咗呢個課程，同埋係我開咗個頭，冇理由突然間放棄咁冇責任感。」一心二用，後果往往只會兩邊都吃力不討好，「都唔知最好嘅決定應該係點，我好想讀埋佢，我都知道喺事業方面而家係黃金時間，（靜默五秒）我諗我盡量會唔令自己後悔，就算結果係點，唔後悔就 OK。」

林欣彤奪得冠軍，緋聞男友羅孝勇則奪得季軍，二人雙雙殺入娛圈。（《忽然 1周》圖片）

勝出比賽後三日即上《勁歌金曲》，同場有（右起）陸永、樂瞳、周國賢、麥浚龍及周麗淇。（《蘋果日報》圖片）

上週四她與 Amanda S.（左）及古巨基出席她首個有酬勞的商業活動。

雖然決賽當晚表現失準，但仍奪得冠軍，林欣彤說：「好似坐咗一程過山車，有少少混亂，但又好開心。」

最愛音樂男

林欣彤拍過四次拖，最長一次拍了兩年，跟對上一個男友又拍了一年，因為相處問題在比賽前分手。「我哋係和平分手，係大家對一啲事嘅睇法唔同。」她聲言跟兩位《巨聲》緋聞男友羅孝勇、胡鴻坤是好朋友，但她不諱言喜歡音樂的男生特別吸引，更不排除有發展空間，她有點含羞地說：「又唔係冇機會嘅，我唔敢話呢一世都冇可能，（即係有發展空間？）都應該有啩，但我暫時都未有心理準備。」做主動？「我諗我唔會，感情方面我係一個好被動嘅人，會睇對方有冇（意思）先。不過我都係唔夠膽，如果對方係冇嘢，我做主動咪好……哈哈。」說了一半的字夾硬地吞回肚中。

雖然開始走進五光十色的娛樂圈，但她亦不介意公開自己大埔居屋家的相片（右圖）。

（《 FACE》圖片）

三歲時的林欣彤。

她與父母和弟弟（右一）的感情都很好。