【轉】周圍賒借還俾甄穎珊 陳樂榣：我同佢再冇拖欠

周圍賒借還俾甄穎珊　陳樂榣：我同佢再冇拖欠
忽然一周
2010年09月24日

最初陳樂榣表示因受公司壓力而不便回應，其後說到甄穎珊向外唱她，陳就無名火起，最後更公開入數紙證明自己還咗錢。

出道四年的整容三嬌 Freeze最終因財失義，近日陳樂榣被爆借甄穎珊錢唔還。雖然甄穎珊事後澄清二人冇為錢反目，但據知甄近日多次向陳發短訊追對方還錢，加上欠債報道出街，令經常呻窮的陳樂榣最終要周圍問朋友和舊同事借錢，再還錢俾甄穎珊。
周二（ 21日），陳樂榣向記者展示入數紙，更眼泛淚光說：「做唔到朋友都算，總之我同佢再冇拖欠！」
整容三嬌 Freeze明年一月便與蕭定一旗下的「一元製作」約滿。已立定決心從良教畫畫的陳樂榣，原來多年前曾向拍檔甄穎珊借了幾萬元，作為供細佬讀書的費用。不過事後有人指陳有錢買衫冇錢還債，兩姊妹最終為錢反目。

承認未按時還錢

本周二（ 21日），記者到陳樂榣任職的畫廊訪問她，起初她不願接受訪問，「唔好意思，公司叫過我唔可以再講，總之喺呢件事上我學咗好多嘢，睇清楚好多人。」今次事件爆煲，全因陳樂榣今個月未有按時還錢，她亦承認自己理財不善，並向記者解釋當日向甄穎珊借錢的情況。「數目真係唔講得，我不嬲都要孭起老竇啲舊債，又要供細佬去台灣讀書。嗰時係佢（甄穎珊）主動話借錢俾我，佢話啲錢擺喺銀行冇息收，所以借俾我賺啲利息。我呢個月的確係遲咗還錢俾佢，不過冇諗過件事咁快會通天。」

《蘋果日報》圖片

陳樂榣（左）和甄穎珊出道時搭晒膊頭，以姊妹相稱，怎料最後因財失義。本周甄和石詠莉更飛起陳樂榣出席中秋節活動，甄在活動上擺明有你冇我，她說：「我同佢（陳樂榣）只係 hi bye friend。」

入數紙清楚寫明收款人為甄穎珊的英文名 Yan Wing Shan，總數為一萬五千元，過數日期是本周一（ 20日）。不過周三甄穎珊在活動中表示陳仍欠她 5位數。本刊記者致電甄，她即轉口風：「其實佢都真係還晒！」

三嬌賣肉多年，可惜撈極唔起，已落實玩到出年 1月拆夥。恨做歌手的石詠莉續約繼續發明星夢，甄穎珊則轉戰飲食界和朋友夾份賣糖水，而陳樂榣就從良教畫畫。

收追數 SMS

為了代父還債才去整容組成 Freeze的陳樂榣，年初已為自己鋪定後路，在中環和灣仔開班授徒教畫畫，下月更舉行慈善畫展。《 Face》圖片

曾經出手相助的甄穎珊，據知近日忙於搞甜品屋生意而性情大變，經常聯同另一成員石詠莉孤立陳樂榣，更周圍唱陳樂榣離隊唔撈。知情人士說：「甄穎珊經常同老闆蕭定一私自開會，話唔好再簽 Alley（陳樂榣），又同人講話以後啲 job淨係安排俾佢同石詠莉就得。 Alley知道仲點有心機撈落去。」另外甄穎珊為了逼陳樂榣盡早還清債，近日更多次 send「再唔還錢後果自負」等威嚇性的 SMS給陳樂榣。
記者向陳樂榣提及 SMS一事，她說：「我哋最近都係以 SMS聯絡，內容當然唔講得。我都聽過有人話唔需要安排 job俾我，但我覺得呢啲嘢唔係由藝人決定，如果客戶真係咁選擇，我都無話可說。」
對於欠債一事，陳樂榣坦言：「啱啱入咗數俾佢啦，仲用 SMS通知咗佢！我同佢做唔到朋友都算，大家仲係同事。」
記者追問陳樂榣錢從何而來，她解釋自上星期報道出街後，便有不少朋友和舊同事主動慰問，「啲錢我都係借返嚟，唔想件事愈搞愈大。總之我同佢再冇拖欠，做嘢一定會同佢見面，邊有得諗尷唔尷尬。」經記者多次游說下，陳樂榣最終向記者展示兩張櫃員機入數紙，收款人係甄穎珊，款項合共為一萬五千蚊。

【轉】Freeze反目 借姊妹錢被唱 陳樂榣：就迫死我啦！

錢作怪
Freeze反目 借姊妹錢被唱
陳樂榣：就迫死我啦！
Face
2010年09月22日

上水捱罐頭
為慳幾蚊，陳樂榣專登去到上水彩園邨一舊式雜貨鋪買 9蚊一罐嘅平價午餐肉，陳樂榣說：「呢度平幾蚊 o架，是但一餐得啦，午餐肉食麵又得、夾麵包又得呀！」

Freeze整容三嬌個個叫窮，其中陳樂榣（ Alley）更有報道話佢借甄穎珊錢唔還，孖住石詠莉一黨數臭姊妹，三嬌因財失義。
但陳樂榣冇錢還其實有苦自己知，要幫老豆還債仲要供細佬讀書，暑假時仲驗到細佬突然白血球過低要搵錢醫，屋漏更兼打大風，搞到陳樂榣要高呼：「就嚟迫死我啦！」

死還死，清咗條數先好喎！

三嬌之一嘅陳樂榣 16歲停學由加拿大返港幫老豆還 700萬炒樓債，除入行時問過老闆蕭定一借過 30萬之外，當年同隊嘅甄穎珊亦主動向 Alley借出 5萬銀幫補生計。

左起：陳樂榣，石詠莉，甄穎珊
Freeze初出道多登台撈算做搵到吓食，三位姊妹感情尚好，不過隨住 o靚模群起， Freeze愈做愈沉，家陣三嬌仲因 5皮嘢反目。《蘋果日報》圖片

陳樂榣細佬身在台灣讀音樂，不幸發現白血球過低，身為家姐的陳樂榣自稱要籌錢畀細佬睇醫生兼買補品補身。

關嘉美：有機會變血癌

陳樂榣話要買補品俾細佬補身，但家庭醫生關嘉美說：「白血球過低是一般由病毒感染，假如長期持續過低，會有機會變成血癌，就算唔係長期，都會影響人體抵抗力，最好都係跟醫生處方食藥啦，亂食補品未必有用！」

諗計度水

借錢
為咗撲水，陳樂榣又去銀行查詢私人貸款，據知 Freeze每月雖有約 10,000蚊底薪兼有薪金證明，但她問清借貸細節後卻憂心忡忡離開。

放袋
去完銀行，陳樂榣再去米蘭站打算放賣 Chanel手袋，職員表示回收價$11,000，不過佢唔知係咪嫌價低，最後冇賣。

鬧爆賤格

可惜近日姊妹情不再，甄穎珊先爆陳樂榣欠債唔還，跟手陳樂榣又話甄穎珊收足利息，據知 Freeze不和，始於上年蕭定一安排陳樂榣拍住黃子華為《我女友係 007》做男女主角配音， Freeze的石詠莉就港女上身唔抵得玩離間，知情者說：「 Sukie（石詠莉）好鍾意搞是非，由《我女友係 007》開始，就係咁同 123（甄穎珊花名）講阿一偏心，戥佢唔抵，覺得 Alley配（音）得唔好，俾佢離間到 Alley差啲唔續約。到今年 Alley教番畫畫，佢哋又夾埋唔就佢排舞時間， 123唱佢好賤格，乜都係有錢先肯做，又話佢擦阿一鞋、又話佢陪老細。最近借錢唔還單嘢爆咗出嚟，好多人都知係邊個講啦。」

上週五（ 17日），本刊發現債仔陳樂榣已搬回上水居屋與母親同住，又要去銀行查詢借錢度難關。週一致電陳樂榣，佢話：「我每個月都要用 4分 3人工幫老豆還債同供細佬讀書，暑假我細佬返嚟突然發咗兩個禮拜燒，醫生話佢白血球過低，影響抵抗力所以要食啲補品，家仲未知咩病，突然用多咗錢，我先同佢（甄穎珊）講今期錢遲 10日先還畀佢，點知咁快就有人寫我唔還錢，我已經搬番去上水同阿媽住，諗住慳啲錢啦，發生咁多事，就嚟迫死我啦！」

對於有傳甄穎珊唱佢賤格，陳樂榣說：「我都聽過，不過我唔想知係邊個講囉，總之呢兩個禮拜就會還錢畀佢，無謂再俾人唱啦！」係囉，有借有還上等人呀！

雙嬌反擊句句甘

債仔陳樂榣為還錢諗盡計，其實 Freeze其餘雙嬌都唔好過，石詠莉繼續等運到，而甄穎珊好彩有兩個錢積蓄，可以同朋友夾錢在尖沙咀搞茶餐廳，不過兩位姊妹對於陳樂榣大反擊都唔多滿意，甄穎珊話：「我冇催過佢還錢喎！」石詠莉則說：「邊個唔啱大家心知肚明啦！」

週一（ 20日）下午橫風橫雨，不過甄穎珊仍然有落尖沙咀新鋪做捧餐妹，由於新店在試業階段，甄話暫時唔想宣傳：「投資幾多錢唔想講喇，到正式開張先再宣傳啦。」

我冇時間搞呢啲是非囉，搞是非冇飽飯食 o架，上個月我屋企有事，我隨口問吓佢啫，冇諗住催佢呀，我都冇收過佢利息 o架，唔明點解有啲咁嘅報道，有時間不如諗吓點樣照顧屋企人啦。真實對白

Freeze三嬌係得石詠莉未有後路繼續要發星夢，問佢有乜搞作時，佢仍話：「家陣排緊舞囉！」

嘩！又關我事呀？唔好乜都拉我落水喎，我冇眼紅過佢呀，邊個唔啱我唔識講，好多嘢大家心知肚明， 123（甄穎珊）為咗呢件事都好唔開心 o架，總之我覺得欠債還錢就天經地義嘅！真實對白